Mânuel Têrz

A m ciâm Manuel Terzi es a sån inamurè dal bån cafà. Par fôrza, as capéss! Ai taché mî nôn e mî nôna, ch’i avêven l antîg Cafà “Bertocchi” a Bulåggna, e pò dåpp la famåuṡa Birarî “Ronżani”, int äl Spadarî, ch’äli êren ataiṡ al Draprî. Pròpi in duv ai êra l’Acadêmia dla Lîra e al quartîr generèl dal Bulåggna Fóttbal Clúbb. A taché a lavurèr a dågg’ ân, al sâbet ed sîra e ala dmanndga dåpp-meżdé, int un quèlc baladûr in duv as balèva la Filúzzi. A lavurèva es a studièva, e in cal mänter a taché a capîr ch’am piaṡêva de pió ed lavurèr drî da un bancån che d studièr l’eletrònica. Siché dånca, quand a finé ed studièr a taché a fèr al baréssta: pò a prinzipié a studièr da baréssta profesionéssta e da someglié, con di gran mésster… am é anc tuchè ed ṡgangèr dla gran pélla par studièr!

Intinimôd, a pòs garantîr che int la mî vétta profesionèl ai ò sänper pruvè d andèr a catèr la rubéṅna miåura pr i mî cliént.

Ai fó un bèl dé che un torefatåur bulgnaiṡ am dmandé s’andèva a lavurèr da ló: mé a i andé e acsé, pr an fèr una tréssta figûra, a taché a studièr pulidén incôsa só l cafà!

Mo sóccia che fât lavurîr! Al fó acsé ch’a capé che al cafà al psêva èser tótt un èter quèl!

A m n adé ch’as psêva catèr dal cafà bunéssum: pròpi spezièl, mégga cunpâgna quall ch’as bvêva dapartótt!

A gé con mî mujêr: “Avän da fèr una cafeterî con di gran cafà!”. A fónn tótt a ónna, siché dånca avêrsen al “Caffè Terzi” dal dåumella e dû.

In Cavalîra (Via Oberdan) al nómmer dîṡ, avêrsen un sît in duv as vindêva såul dal cafà e dal tè. A tachénn a spieghèr a tótt i cliént che al nòster cafà l êra una galantarî, mégga cunpâgna quall che a chi ténp là as catèva in tótt chi èter barr.

In prinzéppi, tótt quî ch’i pruvèven al mî cafà i i avanzèven ed stupén, con tótt chi bón amursén, mo pasè pôc i tachénn a dîr acsé, ch’i n psêven pió bàvver inción èter cafà, fòra che al “Caffè Terzi”!

A n avän mâi spaiṡ gnanc un franc in publizitè, mo a n n avän mâi gnânc avó biṡåggn, defâti i cliént i tachénn a èser sänper de pió, un frâc, un stracantån, una móccia e i giurnaléssta i s vgnêven a fèr däl gran intarvésst.

Mo che fâta sudisfaziån par la mî arżdåura e par mé!

Anc incû i dîṡen acsé che al “Caffè Terzi” l é ón di miûr ed tótt’Itâglia: a sän pròpi stè furtunè… mo ala furtóṅna a i avän dè un bèl cócc’ nó, nó, và mò là!