In sta pâgina qué a vói spieghèruv cum as fà la Napoletèna in cà, mo s’t è bèle lèt cum as fà a fèr la mòca, l é scuèṡi cunpâgn.
- prémma d ónna, al cafà l à da èser bån e frassc, mo maṡnè pió gròs che par la mòca, pió gròs anc che al zóccher bianc;
- rinpî al fîlter, bèl cåulum in manîra ch’al fâga la pirócca int al mèż;
- ciapè int un curtèl (dala pèrt ch’la n tâja brîṡa) e strumnè pulidén al maṡnè däntr int al fîlter, pò srèl pulidén;
- scaldè la caldèra con l’âcua dal rubinàtt e pò cazèla vî;
- scaldè dl’âcua bôna e rinpî la caldèra bèle chèlda infén a arivèr al livèl dla vèlvola, mo stè bän in uraccia d an crûverla brîṡa;
- srè mò la caftîra e mitîla in vatta al fûg èlt;
- apanna ch’la tâca a spruzèr fòra l’âcua, prilè la Napoletèna e tirèla vî dal fûg;
- al cafà l à da vgnîr żå in dû / quâter minûd, anc méi s’i fóssen dû o trî, acsé al vgnaré pió arumâtic;
- a cal pónt lé avî da armiṡdèr e da sarvîr int la chicaréṅna;
- apanna arî finé ed bàvver, vudè mò la napoletèna, cazè vî l’âcua e al cafà bèle druvè e pò lavè pulidén incôsa dapartótt sänza druvèr inción detersîv, mo såul dl’âcua chèlda. E pò ṡgurè pulîd, avîv capé?
- mitî vî la napoletèna quand l’é bèle sótta, par vî ch’la n fâga brîṡa la móffa;
- l é méi s’a druvè dl’âcua minerèl piotòst alżîra. Se pò la srà un pô pió fôrta, ai vgnarà fòra un cafà pió profumè; mäntr invêzi s’la srà un pô pió alcaléṅna al cafà al srà pió dåulz, mo con manc amåur.